უკრაინამ თურქეთში მიწისძვრის სალიკვიდაციო სამუშაოებში ჩასართავად მაშველების უკვე მეორე ჯგუფი გაგზავნა. ინფორმაციას უკრაინის საგანგებო სიტუაციების მართის სამსახური ავრცელებს.
უწყების ცნობით, სულ თურქეთში დასახმარებლად 87 უკრაინელი მაშველი იმყოფება, გაიგზავნა ტექნიკის 18 ერთეული და 10 ძაღლი.
საგანგებო სიტუაციების მართვის სამსახურის სპიკერი ალექსანდრ ხარუჟნი ამბობს, რომ ნომერ პირველი ამოცანა რაც შეიძლება მეტი ადამიანის ნანგრევებიდან ამოყვანაა. მისივე თქმით, უკრაინიდან გაგზავნილი ჯგუფები ყველა შესაბამისი ტექნიკით არიან აღჭურვილი, მათ შორის დრონებით და სტარლინკის ტერმინალებით.
"ჩვენ ქვეყანაში ომია, მაგრამ გვესმის, რომ უნდა დავეხმაროთ და ეს დახმარება ორმხრივია. სხვა ხერხი ამის გაკეთების არ არსებობს... იმედი ყოველთვის არსებობს და ჩვენ უწყვეტად ვმუშაობთ", - თქვა ხარუჟნიმ.
თურქეთსა და სირიაში მიწისძვრების შედეგად დაღუპულთა რიცხვმა 21 000-ს გადააჭარბა.
21 051 დაღუპული ადამიანიდან სტატისტიკა ასე ნაწილდება: 17 674 გარდაცვლილი თურქეთში, ხოლო 72 879 დაშავებული, სირიაში კი 3 377 ადამიანია ამ დროისთვის დაღუპული. რაც შეეხება დაშავებულებს - 5 245 ადამიანი დაშავდა.
***
ძლიერი მიწისძვრა თურქეთსა და სირიაში ორშაბათს, გვიან ღამით მოხდა. მისი სიმძლავრე 7.8 მაგნიტუდას აღწევდა და მას 100-მდე ბიძგი მოჰყვა. სტიქიის გამო დაინგრა ათასობით შენობა. სხვადასხვა ქვეყნიდან თურქეთსა და სირიაში ჰუმანიტარული და სამაშველო დახმარება გაიგზავნა. სამშაბათს დილით ჰუმანიტარული დახმარებით დატვირთული თვითმფრინავები ერაყიდან და ირანიდან დამასკოს აეროპორტში ჩაფრინდა.
მაშველები გააგზავნა საქართველომ, აშშ-მა და ინდოეთმა. ევროკავშირმა გაააქტიურა კრიზისებზე რეაგირების მექანიზმი, ხოლო პალესტინიდან სამოქალაქო და სამედიცინო ჯგუფები სირიასა და თურქეთში გაემგზავრებიან.
დახურვა